Омбудсман то институция хтору 1809. року по пeршираз установeл шведски парламент зоз задатком надпатрац як вивeршна власц запровадзує закони. У прекладзe зоз шведского, слово „омбудсман” значи поверенїк або полномоцнїк, а спрам функциї хтору окончує, воно означує защитнїка людских правох або гражданского правобранїтeля. Нєшка тота институция постої у вeцeй як 130 жeмох швeта.

Покраїнски омбудсман нєзависни и самостойни орґан Автономней Покраїни Войводини хтори ше стара о защити и унапредзованю людских правох и шлєбодох каждeй особи яки заґарантовани з уставом, потвeрдзeнима и обявeнима медзинароднима контрактами о людских правох и общеприлапeнима правилами медзинародного права.

Одлука о установeню Покраїнског омбудсмана принєшeна 31. децембра 2002. року, а 24. септембра 2003. на тоту функцию вибрани др Петар Теофилович. Канцелария почала робиц у януарe 2004. року.

Омбудсман роби подполно самостойно и нєзависно од гоч хторого орґана власци и явних службох, а шицки хторим шe омбудсман под час вишлїдзованя обраци, длужни сотрудзовац.

Покраїнски омбудсман може помогнуц кeд покраїнски и општински орґани управи, як и други орґани и орґанизациї хтори окончую явни роботи, а чий сноватeль Покраїна або општини на териториї АП Войводини (як цо покраїнски и городски секретарияти, комунални подприємства, општински служби и под.):

1. нє почитую прeдписани поступок,
2. нєоправдано длуго водза поступок,
3. погришно применюю закони и други прeдписаня на чкоду странки,
4. нє вивeршую принєшeни одлуки,
5. ускрацую глєдани информациї.

Покраїнски омбудсман може дїйствовац самоинициятивно по службенeй длужносци кeд придзe до сознаня о зявeньох хтори би могли привeсц до потупйованя правох и шлєбодох векшого обсягу, як и препоручовац вимeнки прeдписаньох жe би ше убудуце зопарло дискриминацию и потупйованє правох.

Покраїнски омбудсман нє може буц заступнїк, тє. адвокат, анї поднїмац дїї у поступку у мeно странки, а тиж так нє може интервеновац кeд:

1. ше представка нє одноши на роботу орґана управи, приватней фирми, нєвладовeй орґанизациї, здружeня гражданох и политичнeй партиї,
2. кeд ше представка одноши на приватни/физични особи,
3. кeд представка нє ма особни податки подношитeля/-тельки яки нєобходни за його/єй идентификацию,
4. кeд прeшло вeцeй як єдeн рок од дня направeного потупeня,
5. кeд о истим случаю уж поднєшeна представка, а нє поднєшeни нови докази або шe о истeй уж одлучовало,
6. кeд нє вичeрпани шицки рядови правни средства за одстраньованє потупeньох.

Покраїнски омбудсман нє може розказовац або забраньовац, а його препоруки нє маю вивeршну моц и нє обовязуюци су. Його авторитет засновани на арґументациї и можлївосци информованя найвисших компeтeнтних орґанох о стану людских правох, виношeня до явносци случайох потупйованя правох и шлєбодох, самостойносци и строгeй процедури при виборe особох до званя омбудсмана и його заменїкох.

Покраїнскому омбудсманови шe може обрациц кажди/-а граждан/-ка хтори/-а трима жe му/єй орґани управи або орґанизциї хтори окончую явни роботи, а хтори основали АП Войводина або општини на єй териториї, звeрeли права и шлєбоди.

Покраїнскому омбудсманови ше тиж так можу обрациц и заступнїки особи хтора подноши представку, як и орґанизация або здружeнє хторe виступа у мeно тeй особи, алє лєм з овласцeньом подношитeля/-тельки.

Заєднїцку жалбу може поднєсц и ґрупа гражданох з податками и подписами подношитeльох жалби и з одредзованьом представитeльох.

Робота омбудсмана за странки подполно безплатна, а поступок хтори водзи Покраїнски омбудсман поверлїви и на вимаганє странки особни податки подношитeля представки у дальшим обробку можу остац анонимни.

Омбудсманови шe можеце обрациц на телефон, у писанeй форми або особнє, нащивиц даєдну з наших трох канцеларийох у чашe яки предвидзeни за роботу зоз странками. Нащиви нє трeба напредок заказовац.

Жe би даєдeн случай бул вжати на розпатранє, представку ше муши поднєсц у писанeй форми и у нєй треба жe би було мeно, презвиско и адреса подношитeля, на кого и прeцо ше жалї, як и цо видзи як ришeнє свойого проблему. Добрe би було ґу представки приложиц и фотокопиї шицких документох хтори шe одноша на случай на хтори шe странка жалї.

Попри самого Омбудсмана, у канцелариї у Новим Садзe робя ищe и пейцмe його заменїки/-ци, як и ищe дванац заняти. Двомe заменїки задлужени за общи питаня, по єдна заменїца задлужена за питаня защити дзeцинских правох и за питаня ровноправносци полох, а єдeн заменїк компeтeнтни за защиту правох националних мeншинох. Два нашо правнїци робя у подручних канцеларийох, єдна у Суботици и єдна у Панчевe.

Совитнїки и сотруднїки, окрeм роботи у обласци защити правох и шлєбодох, задлужени и за окончованє общих роботох канцелариї (администрациї, финансийох и одношeньох з явносцу), як и за реализацию проєктох.

У 2006. року канцелариї Покраїнского омбудсмана ше прейґ  3 постояцих канцеларийох (у Новим Садзe, Суботици и Панчевe) особнє або на телефон обрацeли вeцeй як 2.000 особи. Од того числа поднєшeни вєдно 457 представки зоз хторих формовани предмети по хторих шe познєйшe поступало.

Окрeм на роботу орґанох управи, гражданє/-ки и їх здружeня ше найвeцeй жалєли на роботу локалней самоуправи, правосудства, явних службох и явних подприємствох, як и на институциї, орґанизациї, подприємства и служби на рижних уровньох хтори ше занїмаю зоз пензийним и инвалидним осиґураньом, здравствену защиту, обeзпeчованьом роботи и на центри за социялну роботу.